الكون ما هو ؟ : حواديت النجوم - الحلقة الأولى

الحلقة الأولى

ما هو الكون  ؟؟

السلام عليكم ، أهلا بيكم مع أولى حلقات برنامج #حواديت_النجوم البرنامج مش عن نجوم الفن والكورة ، لا ده عن النجوم اللى بنشوفها بالليل والنهار ، هتسألني هو فيه نجوم بالنهار هقلك أيوة طبعا أمال الشمس الشموسة اللى بنشوفها في عز الظهر دى تبقى إيه ما هى نجوم بردوه بس عشان احنا بندور حواليها سميناها شمس.

في البرنامج هنحكي حدوتة طووووويلة لكنها شيقة جدا ، هنحكي حدوتة الكون بداية من أصله وحتى شكله الحالي وتصور العلماء لمستقبله كمان .

ما هو الكون ؟

ببساطة هو المكان والزمان وكل شىء موجود في حيز الوجود ، وده بيخلينا نطرح سؤال هو الكون نقدر نشوفه كله ونرصده كاملا؟

في الواقع هو فيه مفهومين للكون ، الكون المطلق اللى اتكون بعد الانفجار العظيم وده هنعرفه بعدين ، والكون المرصود وده اللى بنقدر نشوفه حسب أدواتنا قدراتها وصلت لفين وكل ما الرصد يتسع ويتقدم ونعرف أكتر عن الكون المرصود الكون يكبر تدريجيا .

هل يوجد أكوان متعددة ولا كون واحد ؟

فيه نظريات عدة تتبنى فكرة وفرضية الأكوان المتعددة وهى كالاتي:

1-   النظرية الأولى بتقترح أن الكون واحد وكبير ،لكنه يضم داخله عدة أكوان متباعدة ومنعزلة عن بعضها وكل كون صغير خاضغ وبتحكمه قوانين فيزيائية مختلفة عن الكون اآخر وده بسبب اختلاف بنية كل كون عن الآخر.

2-   النظرية الثانية الأكوان المتوازية واللى اقترحها العالم إيفريت عام 1954 وقال فيها أن الكون بتاعنا تفرع منه أكوان متوازية لكن بنهايات مختلفة بمعنى أن الديناصورات لم تنقرض من أحد الأكوان دى في حين أنها انقرضت في الكون الخاص بينا وهكذا فالاحتمالات كبيرة جدا ، استلهم نظريته من مبدأ عدم التأكد لهايزنبرج واللي بيقول فيه أن أى مادة على مستوى الكم لها عدة حالات وأننا لما بنرصدها بتسلك سلوك معين مختلف كل مرة وده بيخلينا نجهل أى صورة هتكون فيها لما نرصدها تاني ، الأخ "ايفريت" قال أن لو واحد رصد مثلا أى مادة فحالاتها التانية الكون بيتفرع لأكوان تانية بيكون فيها واحد شبه اللى بيرصدها هنا في الكون بتاعنا بيرصدها في الكون الخاص بيه بس في الحالة الأخرى.طبعا النظرية دى ضعيفة جدا وغير منطقية .

3-   النظرية الثالثة نظرية الأوتار بتقترح أن أصغر بناء للذرة مش الكترونات او بروتونات أو نيترونات وإنما شرائط رفيعة جدا من الطاقة أسموها أوتار ، حسب اهتزازها بيتحدد شكل وحالة المادة وبالتالي شكل وطبيعة الأكوان المتوازية هيتغير حسب اهتزازها.

4-   النظرية الرابعة نظرية الفقاعات الكونية شرحها ببساطة "براين جرين" في كتابه "الواقع الخفي" قال : لو افترضنا أن فيه حفيرة صغيرة موجودة في صحراء واسعة ، وهناك طائرة ورمت كرة ، احتمال أن تقع الكرة داخل الحفرة ضئيل جدا ، لكن إذا رمت الطائرة مليارات الكرات فهناك احتمال كبير أن تسقط كرة داخل الحفرة . وإذا توفرت ظروف مناسبة للحياة مع وجود كائنات مثل الفطريات ستنمو ولن تعرف أن فيه كرات أخرى إلا عندما تخرج الفطريات من الحفرة. وقتها هتعرف أن فيه أكوان أخرى موجودة رغم أنها مش شايفاها ، نفس الحال معانا عدم قدرتنا على رصد أكوان أخرى ليس معناها بالضرورة أنها غير موجودة.

5-   وأخيرا إليك نظريتي الخاصة ومبنية على أساس علمي ومنطقي هشرحها بمثالين ، الأول كوكب الأرض يعيش فيه الإنسان والجن والحيوانات برية وبحرية وحشرات بأنواعها وكائنات دقيقة بأنواعها وممكن أصناف أخرى لا يعلمها إلا الله ، الكل عايش على نفس الكوكب يعني نفس المكان والزمان ، بالرغم من كدة إلا أن كل جنس منهم عايش في واقع مختلف عن واقع الجنس الآخر مثلا واقع البشر في الكون الخاص بيهم يختلف تماما عن واقع الجن في الكون الخاص بيهم . 

ه   تسألني إزاى ؟؟؟؟؟؟؟ واقع البشر مثلا ناتج من إدراكهم  وإحساسهم لما هو موجود حولهم من خلال حواسهم وأدوات قياسهم مثلا لو عندنا بطيخة وطلبت من مجموعة من البشر يوصفوها أكيد مش هيختلفوا مع بعض في وصفها وده لأنهم قاسوها ولاحظوها بنفس الأدوات وهى عيون وأنوف وأيادي كلهم هيشفوها خضراء من الخارج وحمراء من الداخل وبها بذور سوداء وملمسها ناعم وصلب ، 

    

   ناخد بقى البطيخة ونطلب من مجموعة من الجن اللى طبيعة أجسامهم مختلفة تماما عن طبيعة أجسام البشر بالتالي وصفهم لنفس البطيخة أكيد هيختلف يعني لونها ممكن يكون أسود مثلا عندهم وملمسها الخارجي ممكن يكون حاجة تانية وهكذا الواقع الخاص بكونهم هيختلف تماما عن الواقع الخاص بينا بالتالي شكل وطبيعة الكون وتكوينه هتختلف حسب طريقة رصده ومعلوماتنا عنه. 

   عندنا ممكن نكون عرفنا خاصية واحدة في الجاذبية مثلا هناك عارفين خواص اكتر بالتالي قوانيهم هتختلف عن قوانينا لأنا علومهم أكتر وممكن أشمل مننا ، مثال تانى لو افترضنا إننا اخترعنا عباءة تقدر تكسب الللى يلبسها قدرة إنه يشوف الكون زى الجن من منظورهم هيشعر إنه اتنقل لكون مختلف تماما لدرجة أن غرفة نومه اللى متعود عليها سنين مش هيقدر يتعرف عليها مع إنه متحركش منها أصلا لكن مخه هيترجم الى حصله أنه سافر لعالم مواز وكون آخر . باختصار الأكوان المتوازية موجودة حسب طبيعة الكائنات اللي عايشين فيها .

     سؤال ممكن يخطر على بالك هل الكون مسطح أم كروي ؟

إذا كنت تقصد الكون المطلق بكل شىء فيه فقد يكون مسطح أو كروي أما إذا كنت تقصد فقط الجزء المرصود منه فلابد أن يكون مسطح لأن إذا كان الكون المطلق كروي فالكون المرصود سيكون جزءا صغيرا ورصدنا لحدوده ستكون صغيرة لا تكفي لوجود انحناءات ، بمعنى لو هناك نملة صغيرة تتحرك فوق بالون فبالنسبة لها الكون مسطح وهو الحدود التي تمشي فوقها .

وإلى هنا تنتهي الحلقة الأولى من برنامج #حواديت_النجوم .

كانت معكم : الشيماء حويرة (أسيرة النجوم) .

يمكنك أن تقرأ أيضا

ما هى أسباب الطلاق؟

المصادر
ما المقصود بكلمة كون؟